2023/08/02
湯文亮
有開車行兼維修的租客同我講，唔係冇生意，而係冇人手，現在班伙記已經做到「爆晒偈」，申請外來工作人員又冇消息，如果班伙記頂唔順話唔做，車行可能要執笠。唔知點解政府對於批核外來工作人員會咁慢，難道政府唔知道香港現在缺人缺到黐線，最保守估計欠30萬人，應該趁做生意的人手上仲有魄力以及資金，從速批准大量人才專才來港，如果太遲的話，恐怕他們已經結束生意，放寬專才來港也沒有幫助。
香港失業率只得2.9％，已經是低無可低，理論上GDP應該大幅上升，但香港最新GDP只是上升了1.5％，大幅低於預期，香港人已經做到「爆晒偈」，政府唔好再歎慢板。
港人做到爆偈 政府應淘沙見金
政府應該以淘沙見金式放寬人才輸入，讓那些有需要的公司或者機構大量輸入，唔需要嚴格審查。老實說，就算在輸入人才之前做足審查，結果都可能唔啱用，未必是輸入的機構唔啱，而是輸入的人才水土不服，唔認為香港是適合他們工作的地方而離開，在淘沙見金之下，香港才可以得到足夠人才以及專才。
有人話就算輸入專才人才都冇用，不少香港人已經對香港失去歸屬感，在假期的時候，比較手緊的會北上消費，比較寬裕的會「返家鄉」日本，留港的人消費意欲不高。其實大家可能唔察覺，來港的人才專才將會留港消費。大家如果去過其他地方工作過就會知道，平日在當地消費不在話下，即使是假期都唔會離開工作地方，來港工作的人又點會在假日北上消費，如果有30萬人來港工作，消費總額比60萬香港人更多，由於他們在港消費，產生更多就業機會，直接令香港GDP上升。有老友同我講，香港官員唔係唔知，而是唔想去做，有咁嘅官員，相信並非香港之福。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
