2015-01-19
太陽報
今個禮拜相當旺場，再有多幅地皮截標，共有三個項目輪住截標，港鐵（00066）日出康城第六期項目於今日打頭陣。劉Sir知道項目每方呎補價金額約2,269元，比第五期高出21.1%，但由於地皮近海，市場認為會有5至6份標書，其中日出康城有項目嘅新地（00016）尋日話會獨資入標。而禮拜五就輪到觀塘鴻業街商業地同葵涌興芳路商住地截標，兩地估值加埋約51.4億元。
日出康城第六期項目早前收到多達23份意向書，係歷來最多意向書嘅鐵路項目之一。
劉Sir收到風，今次項目補地價金額約莫33.45億元，每方呎補價大約2,269元，項目不設前期工程費，分紅比例就要最少15%。唔計其他發展條款嘅差異，單計每方呎補價就比起第五期高出約莫21.1%。
美聯測量師行林子彬就覺得，日出康城第六期規模都唔細，相信都係以大型發展商競投為主，特別係喺區內有發展經驗嘅財團。
新地會地有意競逐
佢認為，今次項目位置近海，提供單位數目上限大約2,400伙，發展上都幾有彈性，預期都會有5至6份標書。事實上，先後投得日出康城第四及五期嘅新地同埋會德豐地產，都已表態有興趣。
觀塘商業地估48億
而緊接喺禮拜五就會有兩幅官地截標，其中較有份量嘅係觀塘鴻業街商業地，項目總樓面多達約88.39萬方呎，市場估計每方呎樓面地價可以做到約5,000至5,500元，即係估值最多約48.62億元。
另一幅截標地皮係規模較細嘅葵涌興芳路商住地，以最大可建樓面計，項目總樓面大5.55萬方呎。林子彬話，呢個項目規模啱中小型發展商，同區新盤供應唔多，加上位置近民生區，所以商舖部分都有一定價值，估計反應會唔錯。市場估值最高約2.78億元，樓面呎價大5,000元。