2014-01-08
太陽報
雙倍印花稅措施冷卻商用物業炒風，東九龍商廈樓價顯著回落，就連工轉商補地價都平咗。億京發展嘅觀塘創業街15至17號工廈項目，早排傾唔掂向地政總署上訴，近排終於傾掂數，達成工轉商補價協議，涉及金額約11.2億元，圍起上嚟樓面呎價約4,200元，同首次批出個陣比，每方呎平咗200元，計下數畀少5,300幾萬元。
億京發展項目策劃經理黎裕宗同劉Sir講，早前接獲上述創業街項目工轉商補價回覆，每方呎約4,400元，公司認為市況差咗，個價相信可以低啲，所以決定提出上訴。早前就接獲回覆，補價減到11.2億元左右，以項目總樓面約26.64萬方呎計，樓面呎價約4,200元，算係合理價錢，所以決定接受。
冀趕及年底賣樓花
有代理話，新地（00016）及王氏國際（00099）合作同區海濱道181號國際時代中心臨海商廈重建項目，舊年都完成補價約19.5億元，樓面呎價約4,300元，比上述項目每方呎多100元。上述億京項目鄰近創紀之城2期及牛頭角港鐵站，都算商業核心地段，所以今次補價反映番市況。
黎裕宗話，上述創業街項目總投資額20億元，依家起到7樓，最快希望今年底可以賣樓花，項目樓高約41層，除地下有約三層為商場外，10及11樓劃作樓上舖用，以配合區內零售客戶需要。
睇番資料，上址原為南豐工業大廈，該集團早在一○年以3.8億元購入址，當是樓面呎價約1,500元，以此估計，日後每方呎售價要約1萬元。
The Three百餘萬進場
近排市場又興番商場拆售，有代理話，拆場天王尹柏權或有關人士，早在○五年拆售嘅銅鑼灣糖街1至5號原小南角狀元樓舊址，拆售部分名為銅鑼廣場。
至於3樓全層未拆部分現命名為The Three，依家會分間約80個舖，入場費百餘萬元，最細建築面積約60方呎，平均建築呎價約3萬元，聽講最快今個月中賣，買家除有機會獲首兩年每年五厘租金回報保證，首批約20個買家有可能獲贈律師費及釐印費。若在短時間上會及不用業主提供按揭，加埋優惠可能相當於樓價打八折。
劉Sir