2014-01-09
太陽報
自從美國聯儲局開始話退市，加息周期進入倒數階段，但本港唔少資深投資者話今年仍然會入市。其中喺近年動輒豪擲億元入市嘅廖偉麟（Jeffrey） 話，佢哋今年會更勇，目標吸納甲級寫字樓同埋商場，諗住投入資金45億元，比起舊年多一成八。而「舖王」鄧成波（波叔）仍然至愛全幢工廈，會再大手吸納。
資深投資者Jeffrey話，舊年買咗金鐘力寶中心等多項物業，成交額加埋約38億元。佢對今年商用物業市場仍然信心十足，主要睇好甲級寫字樓同商場，料總成交額約45億元，按年多7億元，約18%。
商場回報拍住街舖
佢話市場好多人預期今年港股會顯著上升，支持企業擴充信心，寫字樓需求自然增加，租金自然向上。近年連鎖鐘錶店同國際時裝品牌等都多咗租用商場舖，租金升幅唔輸蝕過街舖，租金回報有保證。
近年轉戰工廈活化市場嘅波叔，舊年連環沽咗5幢工廈，帳面淨袋逾12億元，佢話呢幾年政府出咗好多鼓勵工廈業主改裝物業發展嘅措施，全幢工廈投資前景會跑贏大市，今年繼續睇好全幢工廈。相比之下，依家商舖做價太高，好難再大升。
湯文亮十億搵乙廈
同樣睇好今年樓市前景嘅紀惠集團行政總裁湯文亮都話，香港低息環境仲會維持一段時間，佢今年特別睇好乙級寫字樓，主要原因係呢類物業可塑性較高，可以改裝做半零售用途，租金閒閒哋倍升，預計投資額最少10億元。
黎永滔續放眼海外
不過，投資者黎永滔（滔哥）同李冠亮就唔係咁睇，佢哋覺得今年樓市仍受「辣招」影響，都會審慎啲。滔哥話銀行唔願放水，舊年開始減少在港投資物業，轉而買英倫商用物業，今年都唔例外。
滔哥仲話，由於佐敦及尖沙咀街舖租戶類型較廣，包括內地旅客喜愛嘅鐘錶珠寶金行及藥房等，租金升幅可睇高一線，不過，要有平貨先至會考慮入市。
劉Sir