2023-12-15
明報
【明報專訊】我根據自己多年經驗，對美國利率走勢有一個睇法，就是每當美國總統大選，在選舉前1年就開始減息，再之前3個月就停止加息，根本冇人同意我的睇法，我只是自話自說。在這幾個月，偏向美國聯儲局繼續加息的人多於停止加息，香港樓市亦在這個陰影下不斷下跌，日前美聯儲議息是非常關鍵，減唔減息不是最重要，只要放出減息信號便足夠，但如果繼續加息就大件事，股樓都會繼續冧。
我真的不明白，美國欠咁多國債，而佢自己又可以做決定，點解要加息？每年所付利息超過1萬億美元，多過每年8000幾億美元的國防預算。有人話，美國要維持強美元，所以要加息，如果美元真係咁強，唔使畀咁高息，甚至負利率都會有人買美債。以前買美債的人不是貪圖利息，而是安全性，現在則掉轉講，美債是有一定危險性，如果不是咁高息，真係唔會有咁多人買美債，而美債的危險性是美國太強，美國違約都唔知點追。
放寬「專才稅」 比「撤辣」更有效
美國停止加息，代表一個時代終結，代之而起的是減息時代來臨。其實，今次加息期都未夠兩年，就要匆匆落幕，由此可見美國是自己頂唔住高息，而減息是支持香港樓市三個條件之一，其餘兩個是「撤辣」與銀行放貸，今次雖然是「半撤辣」，但放寬「專才稅」，比「撤辣」更有效。
消耗地產商庫存需時 樓市暫難大升
至於銀行放貸，唔通銀行唔做生意，否則一定會借錢畀人買樓，而外電報道國家財政部三來港與銀行界會面，目的是如何振興香港金融業，維持香港國際金融中心地位；而做得金融中心，其中一個條件就是放貸，在三個條件都朝向正面的一方走，樓市反彈可期。不過，要消耗地產商庫存，相信要一段時間，樓市暫時很難大升，但能夠保持平穩已於願足矣。
紀惠集團行政總裁
[湯文亮 敢說反話]