可以買樓未？

香港人乃「奇怪動物」，日日都諗住「投資」（其實當然係日日發夢發達！），無論之前蝕過幾多，天性仍不會改，個個似有大把現金隨時出擊。 昨日又有位公務員老友M問：「碌Sir，樓市跌咗咁多，可以入市未呀？我睇中幾個樓盤，想揀一個出擊呀！」 辣稅仍在 「投資」一買即綁 M仔三十幾歲，仍未結婚，份工非常穩定，買樓也屬正常。應該點忠告佢？一於憑基本分析可也：「M仔，首先，你買樓，是投資或是自住呢？若屬投資，肯定未係時候，連林奮強都沽樓呀！香港物業市場在融化中，第一唔知會再跌幾多（私樓供應遠遠大於需求；移民潮繼續；捱高息日子難測……）。如今辣椒稅仍在，完全冇得炒，反之，多數一買即綁！」 M仔眼眨眨微微點頭認同。 「但自住則完全兩回事！自住樓宇，金錢只是其中一個考慮因素，更重要，單位是否住得開心及感覺良好？應先研究通風、座向、地區、鄰居質素……，信風水的，要感受一下入屋後可有覺得心境舒泰與鬆弛。」我逐點慢慢解釋：「自住物業，應視之為『藝術品』，也可視之為『愛人』，不能純以金錢去衡量價值！因整體磁場會直接影響你的健康及人生！」 小弟也曾買過幾間樓，其實無論投資或自住，皆應關注一個直覺——一踏入去，感覺是否舒暢適然？若是，自住或投資也沒問題，因令人感覺良好的物業，在市場中放售的不會多，件件是寶，理應比市價貴一點。購入後若再由專業設計師執一執，將會立時升值。 買樓花要考慮問題多 M仔猛點頭，好似經已領略箇中真諦，但不旋踵又問：「碌Sir，最近大量新樓盤推出，呎價低到非常吸引，若能力負擔得起，應否趁機揀一間落訂，先買入樓花呢？」 買樓花，我從來不做。第一是認識不少老友，落訂後被發展商以不同理由（包括「不可抗力原因」等）拖呀拖，絕少準時交樓；另外，交樓時又出現無數甩漏，激到嘔血也未能完全修妥。 「M仔，買樓，最好買現樓，因一切就在眼前，唔使靠估。一如追女仔娶老婆，你會否睇張『化妝相』就扑槌？有冇咁蠢呀？」 資深傳媒人 曾智華