2024-01-10
明報
【明報專訊】有老友唔明白，政府見樓市下跌，已經「半撤辣」，而且放寬專才稅，以及重啓投資移民計劃，但始終冇辦法令樓價停止下跌，現在搞到政府財赤嚴重，最後除了加稅之外唔知有什麼辦法，而事實上已經有親政府團體叫政府加離境稅，以及資產增值稅，開徵GST銷售稅始終是遲早的事，究竟加稅是否可以解決財赤問題？
如果加稅可以解決財赤問題就不是問題，最怕愈加稅，收入愈少。今日政府出現大額財赤，主要是冇人買樓，地產商見新樓賣唔出，又唔敢投地，大大話話令政府唔見咗700億元賣地收入，加上物業買賣的印花稅、地稅、差餉等，如果政府有那些收入，財赤的數字就會大幅減少，明年可以肯定有盈餘。現在是望天打卦，希望市民去買樓，地產商恢復買地，但如何推動市民買樓，我相信唔係咁多官員知道，知道的又唔會講。
放寬逆周期措施 為樓市「加油」
可惜大多數政府官員都有司機配套，如果他們自己揸車的話，就會發覺在上斜時「dup停」架車，再開時唔係唔再「踩brake」就可以，一定要加油，如果斜坡愈陡，加油愈多，唔「踩brake」架車唔會好似在平地會自動向前行；現在政府只是「半撤辣」，樓市在沒有動力之下又點會回復正常，政府要樓市回復正常一定要加油，究竟油是什麼？
汽車的動力是燃油，樓市的動力是資金，加油的意思是放寬逆周期措施，令到持有多個單位的業主可以利用放寬逆周期措施的資金投入樓市，或者不用賣樓來滿足金管局要求，當業主利用物業得來的資金啓動樓市之後，樓市便會再次啓航，樓價是否上升並不重要，只要成交量增加，樓市便會回復正常，香港經濟亦會回復正常，唔需要考慮什麼離境稅、資產增值稅及GST等。香港亦會很快回復有盈餘的預算案，問題是香港政府、金管局、銀行夠唔夠膽放寬逆周期措施，其實亦不用太多，10％已經足夠。
紀惠集團行政總裁
[湯文亮 敢說反話]