2024-01-19
明報
【明報專訊】有老友問我，點解物業投資者今次咁失策，對樓市下跌沒有準備，現在竟然搞到被銀行call loan。我話大多數物業投資者都做足準備工夫，不但借貸比率合乎金管局要求，而且仲預留資金供樓，但人算不如天算，銀行將物業估價降低，向投資者call loan補差額，令到投資者耗盡準備供樓的資金；如果唔賣走一些物業，根本冇錢供樓，這是近日大家見到有不少物業投資者要賣樓原因。
物業投資者問銀行：「我們一向準時還款，借貸比率又不超過五成，點解仲要向我們call loan？」銀行話他們都唔想，只不過是應金管局要求，迫於無奈才向投資者call loan。換句話說，金管局是「衰人」。
澄清call loan事件 金管局免做「衰人」
幾名商界立法會議員問金管局總裁有冇此事，總裁話不但沒有要求銀行向客戶call loan，反而出了指引，要求銀行不能單以抵押品價值下降而call loan，也應考慮市場變化以及借貸人過往的表現。今次真係「口同鼻拗」，究竟金管局有冇要求銀行向客戶call loan，我認為是有的，不過金管局總裁唔知道，在現時經濟環境下，銀行亦希望向客戶call loan，所以在「半推半就」下call loan，就算客戶投訴，都可以將責任推卸到金管局。
今次金管局總裁「躺着也中槍」，不過也是好事，將call loan事件澄清，以後銀行向客戶追數亦唔能夠推卸金管局。
紀惠集團行政總裁
[湯文亮 敢說反話]