2024-02-19
星島日報
年初五開工第一日，有老友到公司拜年，佢話避年，費事見班銀行家。在過年前，被班銀行家call loan call到失魂，如果在拜年時又call loan，真係反面都似，所以走嚟同我拜年，兼睇下有冇良策應付銀行call loan。
改變應付銀行策略
我首先問，現在銀行call loan，老友如何應付。老友話現在已經對銀行講，將會賣走一些非核心又按在其他銀行的物業，如果賣得走，就會有錢還債，銀行聽到之後call得仲急，老友話唔明白。
借貸比率下降 貸款更為安全
其實道理很簡單，由於那些物業並不是按在call loan的銀行，故此他們逼業主賣樓還貸，將貸款金額降低，令到call loan銀行的借貸比率下降，貸款更為安全。
我同老友講，要改變一下策略，就是賣走call loan銀行的物業。由於借貸比率普遍低於五成，當call loan銀行知道被call的客戶要賣走按在自己銀行的物業，反而不會call loan。
因為客戶如果賣得走，call loan銀行就會損失一筆生意，而事實上call loan銀行最希望被call的客戶賣走按在其他銀行的物業，不但可以令同業失了筆生意，同時令自己的貸款更為安全，所以一定要賣走call loan銀行的物業，否則，銀行只會越call越急。
湯文亮
紀惠集團副主席及行政總裁