2024-03-13
明報
【明報專訊】近日新樓銷售市場出現很多大手成交，最矚目是長沙灣新樓盤，有大手客以超過億六元掃24個單位，究竟那些是什麼人？理論上香港炒家畀銀行call loan call到失魂，買三兩個單位還可以，點都唔會買24個咁多。
香港報紙對樓市的報道，日日都是負面消息，唔係劈價賣樓，就是業主蝕讓，賺錢的是不會報道，令到打算買樓的香港人不但不敢買樓，甚至連睇樓都唔敢，恐怕在睇樓之後，畀代理「𦧲」到要買樓。其實，如果他們去睇樓，就會發覺樓價不是那麼低殘，報紙所講的低價成交只是佔小部分，而且大多數是銀主貨，財仔低價賣樓是正常不過的事，如果真係要買樓，畀多一成樓價都未必買到，唔認真觀察樓市，又點會認清樓市真面目。
以團購力量向地產商爭取最大優惠
香港人唔觀察樓市，但有心在香港置業的內地人就有唔同做法，他們不時組團來香港睇樓，當政府取消辣招稅之後，他們就會大舉出動，我講大家都未必會相信，在財爺「撤辣」之後，發展商唔夠半個月已經大約賣了2000個新樓單位，內地買家佔接近八成，正是行船爭解纜，今次香港人恐怕失了先機。
現在來港買樓的內地人最喜歡組織「觀摩團」，以團購力量同地產商爭取最大優惠，而在適當時候又會將所買入的單位「摩走」，不過唔會賣畀香港人，而是賣返畀內地同鄉，有了穩定客源，「觀摩團」會愈來愈多，單打獨鬥的香港炒家將會處於下風，而「觀摩團」除了新樓之外，亦向二手樓埋手，近日二手樓買賣大幅上升，買家有很多屬於「觀摩團」，如果香港人仍然處於觀望階段，只睇不買，最後要同內地人買「摩貨」，本末倒置的事，莫過於此。
紀惠集團行政總裁
[湯文亮 敢說反話]