2024-03-28
明報
【明報專訊】有老友話有1億元現金，見現在樓價下跌，打算買兩億元物業，問銀行借1億元，問我這個計劃是否可行。我話這不是可行與否的問題，而是現在做物業投資者的壓力很大，如果頂唔順分分鐘連命都冇，投資只是情趣，唔係玩命，如果真係要買樓投資，最好不要問銀行借錢，1億元現金買1億元物業都唔得，最好留返2000萬元現金做儲備，這才可以安枕無憂。
老友唔係幾明白，買樓投資，一定要問銀行借錢，這是物業投資的物質不變定律，點解唔問銀行借錢。其實是有理由的，現在問銀行借錢的利息似乎唔係咁高，但相對收租回報，幾乎高了1倍，買2億元物業問銀行借1億元，最好結果就是打和，贏錢是靠物業升值，與買比特幣差不多，似乎唔係咁划算，所以，現在問銀行借錢買樓收租不是一個聰明的選擇。
如果有1億元現金，次好的投資方法就是做定存，衰極都有4厘年息，每年收息400萬元，每日多過1萬元，根本用唔晒。不過當樓價上升，就千祈唔好眼紅那些借錢買樓收租的業主，他們被銀行call loan時的壓力，非局外人可以明白，不如諗吓點樣每日可以用1萬元仲好。
較好的方法就是買8000萬元物業，2000萬元做定存，收租有3厘回報，定存有4厘，每年有240萬元租金收入，定存80萬元，每年有320萬元收入。就算租唔出，每年仍然有80萬元做生活費，慳慳地都夠，倘若樓價上升1倍，8000萬元變1.6億元，雖然冇問銀行借錢買樓咁好，但仍然可以享受物業升值樂趣。至於最好的投資方法，老實說，我唔識，或者沒有最好，只有較好或者次好。
紀惠集團行政總裁
[湯文亮 敢說反話]